Thursday, February 20, 2014

ಮಳೆ, ಬೆಂಕಿಪೊಟ್ಟಣ, ಬಿಳ್‌ಬಿಳೀ ಟವೆಲ್ಲು...



ಒಂದಿನ ಜೋರಾಗಿ ಮಳೆ ಬಂದುಬಿಡ್ತು. ಆಗ ಗುಬ್ಬಕ್ಕ ಜೋರಾಗಿ ಅಳೋದಕ್ಕೆ ಶುರು ಮಾಡಿದ್ಲು. ನಾ ಯಾರ ಮನೆಗೆ ಹೋಗ್ಲಿ... ಈ ಮಳೆ ಬೇರೆ ನಿಲ್ತಿಲ್ಲ ಅಂತ. ಇದ್ದೊಬ್ಬ ಫ್ರೆಂಡ್‌ ಕಾಗಣ್ಣನ ಜೊತೆ ಜಗಳ ಆಡ್ಕೊಂಬಿಟ್ಟಿದ್ದೀನಿ... ಅರೆ ಯಾಕೆ ಜಗಳಾಡ್ಕೊಂಡೆ ಅಂತ ನೆನಪಿಸ್ಕೊಳ್ಳೋದಕ್ಕೆ ಶುರು ಮಾಡ್ತು ಮಲ್ಲಿಗೆ ಬಳ್ಳಿ ಒಂದೇ ಎಲೆ ಕೆಳಗೆ ಗಡಗಡ ನಡಗ್ತಾ ಕೂತು ಗುಬ್ಬಕ್ಕ....

ಹಾಂ...ಆ ಗೂಬಜ್ಜಿಗೋಸ್ಕರ. ಅವಳ ಅಳಿಯನಿಗೆ ಎಸ್‌ಎಂಎಸ್‌ ಮಾಡ್ಬೇಕಿತ್ತಂತೆ ಆಫೀಸಿಂದ ಬರ‍್ತಾ ಹಣ್ಣು ತಗೊಂಬಾ ಅಂತ... ಗೂಬಜ್ಜಿ ಮೊಬೈಲ್‌ನಲ್ಲಿ ಕರೆನ್ಸಿ ಖಾಲಿ ಆಗೋಗಿತ್ತು, ನನ್ತ ಮೊಬೈಲ್‌ ನೀರು ಬಿದ್ದು ಕೆಟ್ಟೋಗಿತ್ತು. ಅದಕ್ಕೆ ಕಾಗಣ್ಣನ ಮೊಬೈಲ್ ಕೇಳಿದೆ ಅವ ಕೊಡ್ಲಿಲ್ಲ. ಎಷ್ಟು ಕಂಜೂಸು ನೀನು ಅಂತ ಜೋರಾಗಿ ಕಾಗಣ್ಣನಿಗೆ ಬೈದು ಓಡಿಹೋಗ್ಬಿಟ್ಟಿದ್ದೆ ಅಲ್ವಾ? ಅವ ಏನೇನೋ ಬೈಯ್ತಾನೇ ಇದ್ದ. ನಾ ಕೇಳಿಸ್ಕೊಳ್ಳದೇ ಓಡಿಬಿಟ್ಟಿದ್ದೆ...
ಆದ್ರೆ ಈಗ? ಈಗ ನನ್‌ ಮನೆ ಬಿದ್ದೋಗಿದೆ. ಸಿಕ್ಕಾಪಟ್ಟೆ ಕತ್ಲು ಆಗಿದೆ. ಬೇರೆ ಯಾರೂ ನಂಗೆ ಕ್ಲೋಸ್‌ ಇಲ್ಲ. ಸೋ... ಕಾಗಣ್ಣನ ಮನೆಗೇ ಹೋದ್ರಾಯ್ತು ಅಂತ ಜೋರು ಮಳೆಯಲ್ಲೇ ಹಾರೋದಕ್ಕೆ ಶುರು ಮಾಡ್ತು ಗುಬ್ಬಕ್ಕ. ಅಂತೂ ಕಾಗಣ್ಣನ ಮನೆ ಬಂದು ಪಟ್‌ಪಟ್‌ ಬಾಗಿಲು ಬಡೀತು ಗುಬ್ಬಕ್ಕ. ಆಗ ಕಾಗಣ್ಣ ಕೈಯಲ್ಲಿ ಟಾರ್ಚ್ ಹಿಡ್ಕೊಂಡು ಬಾಗಿಲ ಕಡೆ ಬಂದು, ಯಾರದು ಇಷ್ಟೊತ್ತಿನಲ್ಲಿ ಅಂತ ಕೂಗಿದ. ಗುಬ್ಬಕ್ಕ ನಾನೋ ಕಣೋ ಕಾಗಣ್ಣ, ಬೇಗ ಬಾಗಿಲು ತೆಗಿ ಅಂತ ನಡಗೋ ದನಿಯಲ್ಲಿ ಹೇಳ್ತು. ಅಯ್ಯೋ ನೀನೇನೇ ಗುಬ್ಬಕ್ಕಾ... ಬೇಗ ಬಾ ಒಳಗೆ ಅಂತ ಬಾಗಿಲಿಗೆ ಸಿಗಿಸಿದ್ದ ಸೇಫ್ಟಿಪಿನ್‌ನ ಲ್ಯಾಚ್‌ ತೆಗೀತು ಕಾಗಣ್ಣ.

ಒಳಗೆ ಬಂದ ಗುಬ್ಬಕ್ಕ ಡೈನಿಂಗ್ ಟೇಬಲ್‌ ಮೇಲಿಟ್ಟಿದ್ದ ಕರಿಬೇವಿನ ಎಸಳಿನ ಮೇಲೆ ನಡಕ್ಕೊಂಡು ಕೂತ್ಲು. ಮೊದಲು ಇದನ್ನು ತಗೊ ಅಂತ ಬೆಂಕಿಪೊಟ್ಟಣ ಓಪನ್‌ ಮಾಡಿತು ಕಾಗಣ್ಣ. ಡೆಟಾಲ್‌ ಹಾಕಿ ವಾಷ್‌ ಮಾಡಿ ಮಡ್ಚಿಟ್ಟ ಬಿಳ್‌ಬಿಳೀ ಟಾವೆಲ್‌ ಅನ್ನು ಗುಬ್ಬಕ್ಕ ನಿಧಾನಕ್ಕೆ ಹೊರಗೆಳೆದುಕೊಂಡ್ಲು. ಹಾಗೆ ಅಂಗಿ, ಚಡ್ಡಿ, ಟೋಪಿಯನ್ನೂ ಹಾಕ್ಕೊಂಡ್ಲು. ಗ್ಲೌಸ್ ಬೇಡ್ವಾ ಅಂತ ಕೇಳಿದ ಕಾಗಣ್ಣ. ಇವು ತುಂಬಾ ದೊಡ್ಡದಾಗುತ್ವೆ ಅಂತ ಬೇಡ ಅಂದ್ಲು ಗುಬ್ಬಕ್ಕ.


ಗುಬ್ಬಕ್ಕ ನೀಟಾಗಿ ಮೈಕೈ ಒರೆಸ್ಕೊಂಡ್ರೂ ಚಳಿ ಕಮ್ಮೀ ಆಗ್ಲಿಲ್ಲ. ಗಡಗಡ ನಡಗ್ತಾ ಬಡಬಡ ಓಡ್ಕೊಂಡು ಅಡುಗೆ ಮನೆಗೆ ಓಡ್ಹೋದ್ಲು. ಕಾಗಣ್ಣ ಕುಕ್ಕರ್‌ನ ಮುಚ್ಚಳ ತೆಗೆದು ಸ್ಪೂನ್‌ನಿಂದ ಎರಡು ಪುಟ್ಟ ಕಪ್ಪೆಚಿಪ್ಪುಗಳೊಳಗೆ ಮಮ್ಮಮ್‌ ಹಾಕ್ಬಿಟ್ಟು ಉಫ್ ಉಫ್ ಅಂತಾ ಇದ್ದ. ಸ್ಟೋ ಮೇಲೆ ದಾಲ್‌ ಕುದೀತಿತ್ತು. ತುಪ್ಪದ ಗಿಂಡಿ ತಗೊಳೋಣ ಅಂತ ಈ ಕಡೆ ಹೊರಳ್ತಾನೆ.. ಕಾಗಣ್ಣ... ಗುಬ್ಬಕ್ಕ ಸಕ್ಕರೆ ಡಬ್ಬಿ ಮೇಲೆ ಸಪ್ಪ ಮುಖ ಮಾಡಿ ಕೂತ್ಕೊಂಡಿದ್ದು ಕಂಡಿತು...

ಅರೆ ಗುಬ್ಸ್‌ ಏನಾಯ್ತೋ ಮಗನೆ ನಿಂಗೆ? ಯಾಕ್‌ ಹೀಗೆ ಸಪ್ಪಗೆ ಕೂತಿದ್ದೀಯಾ ಅಂತು ಕಾಗಣ್ಣ. ಏನಿಲ್ಲ ಸುಮ್‌ಸುಮ್‌ನೆ ಯಾರದೋ ಸಲುವಾಗಿ ನಾ ನಿಂಜೊತೆ ಜಗಳಾಡಿ ಬಿಟ್ಟೆ ಸಾರಿ ಕಣೊ ಅಂದಿತು ಗುಬ್ಬಕ್ಕ. ಏಯ್‌ ಹುಚ್ಚಿ ಸುಮ್ನಿರು. ನೀ ಜಗಳ ಆಡಿದ್ದು ಒಳ್ಳೇ ರೀಸನ್‌ಗೆ ತಾನೆ? ನಾ ಆ ಟೈಮ್‌ ಗೆ ನಿಂಗೆ ಹೆಲ್ಪ್ ಮಾಡಕ್ಕಾಗ್ಲಿಲ್ಲ. ಸಾರಿ ನಾ ಕೇಳಬೇಕು ಅನ್ನುತ್ತೆ ಕಾಗಣ್ಣ. ಸರ‍್ಸರಿ... ಈಗ ಮೊದಲು ಮಮ್ಮಮ್ ಮಾಡೋಣ ಬಾ ಅಂತ ಕೈ ಹಿಡಿದು ನಿಧಾನಕ್ಕೆ ಸಕ್ಕರೆ ಡಬ್ಬಿಯಿಂದ ಕೆಳಗಿಳಿಸ್ಕೊಳ್ಳತ್ತೆ. ಆಗ ಗುಬ್ಬಕ್ಕಂಗೆ ಸ್ವಲ್ಪ ಸಮಾಧಾನವಾಗುತ್ತೆ. ಪಲ್ಯ ಸಾರು ಮಾಡಕ್ಕಾಗಿಲ್ಲ, ಮಳೆ ನೋಡು ತರಕಾರೀನೇ ತಂದಿಲ್ಲ. ದಾಲ್‌ ಮಾಡಿದೀನಿ ಅಡ್ಜಸ್ಟ್‌ ಮಾಡ್ಕೊ ಅನ್ನುತ್ತೆ ಕಾಗಣ್ಣ. ಸೂಜಿಯಿಂದ ಉಪ್ಪಿನಕಾಯಿ ಚುಚ್ಚಿ ಎರಡು ಹೋಳನ್ನು ಎರಡೂ ತಟ್ಟೆಗೆ ಹಾಕ್ಕೊಳ್ಳತ್ತೆ.  ತುಂಬಾನೇ ಹಸಿವಾಗಿರುತ್ತೆ ಗುಬ್ಬಕ್ಕಂಗೆ. ಗಬಗಬ ಅಂತ ಮಮ್ಮಮ್‌ ಮಾಡಿ, ಸಿರಪ್‌ ಬಾಟಲಿ ಮುಚ್ಚಳದಲ್ಲಿದ್ದ ನೀರನ್ನ ಗಟಗಟ ಕುಡಿದು ಅಬ್‌.... ಅಂತ ಡೇಗು ತೆಗೆಯುತ್ತೆ.

ಕಾಗಣ್ಣ ಅಡುಗೆ ಮನೆ ಕ್ಲೀನ್ ಮಾಡಿ ಬರೋಹೊತ್ತಿಗೆ ಗುಬ್ಬಕ್ಕ ಟಿವಿ ಆನ್ ಮಾಡ್ಕೊಂಡು, ಯಾವ ಯಾವ ಊರಲ್ಲಿ ಎಷ್ಟೆಷ್ಟು ಮಳೆಯಾಗಿದೆ, ಎಷ್ಟೆಷ್ಟು ಕಷ್ಟವಾಗ್ತಿದೆ ಅಂತ ಪಿಳಿಪಿಳಿ ಕಣ್ಣು ಬಿಡ್ತಾ ನೋಡ್ತಿರುತ್ತೆ. ಗುಬ್ಸ್‌ ಟಿವಿ ಆಫ್‌ ಮಾಡು, ಬೇಗ ಮಲಗು ಸುಸ್ತಾಗಿಲ್ವಾ? ಅಂತ ಕಾಗಣ್ಣ ಜೋರು ಮಾಡುತ್ತೆ. ನೋಡು ಅಲ್ಲಿ ಪಾಪ ಎಷ್ಟೊಂದೆಲ್ಲಾ ಕಷ್ಟ ಪಡ್ತಿದಾರೆ. ಅವರಿಗೆಲ್ಲ ಮನೇನೇ ಇಲ್ವಂತೆ. ರಾತ್ರಿ ಎಲ್ಲಿ ಮಲಗ್ತಾರೆ? ಅಂತ ಬೇಜಾರು ಮಾಡ್ಕೊಳ್ತಾ ಪಾಪ ಛೆ ಅಲ್ವಾ ಅನ್ನುತ್ತೆ ಗುಬ್ಬಕ್ಕ. ಹೂಂ.. ಏನ್‌ ಮಾಡೋದೀಗ? ಅವರನ್ನೆಲ್ಲಾ ಕರ್‌ಕೊಂಬರಕ್ಕಾಗುತ್ತಾ ನಮ್ಮನೆಗೆ? ಸುಮ್ಮನೆ ಮಲ್ಕೊ ಅಂತ ಹೇಳಿ, ಮೊನ್ನೆ ತಾನೇ ಸಜ್ಜಾ ಮೇಲೆ ಕ್ಲೀನ್‌ ಮಾಡಿಟ್ಟ ತೆಂಗಿನ ಚಿಪ್ಪನ್ನ ಕೆಳಗಿಳಿಸಿ, ಅದರೊಳಗೆ ತಿಳಿಗುಲಾಬಿ ಬಣ್ಣದ ಬೆಡ್‌ಶೀಟ್ ಹಾಸಿ, ಸಣ್ಣ ಪಿಲೋ, ಸಾಫ್ಟ್‌ ರಗ್‌ ಇಟ್ಟು... ಹೋಗು ಬೇಗ ಮಲಗು ಅನ್ನುತ್ತೆ ಕಾಗಣ್ಣ. ಪ್ಚ್‌ ಅನ್ಕೊಂಡು ಗುಬ್ಬಕ್ಕ, ನೀ ಎಲ್ಲ ಮಲ್ಕೊಳ್ತೀಯಾ ಕಾಗಣ್ಣ ಅಂತ ಕೇಳುತ್ತೆ. ಚಾಕೋಲೇಟಿಂದು ಖಾಲಿ ರಟ್ಟಿನ ಡಬ್ಬನೇ ನನ್ನ ಬೆಡ್‌ರೂಂ. ನಾ ಅಲ್ಲೇ ಮಲಗೋದು ಅನ್ನುತ್ತೆ. ಸೊಳ್ಳೆ ಬಂದ್ರೆ ಇಲ್ಲೇ ಬ್ಯಾಟ್‌ ಇದೆ ಓಕೆ? ಎಂದು ಗುಡ್‌ನೈಟ್‌ ಹೇಳುತ್ತೆ ಕಾಗಣ್ಣ. ಓಹ್ ಸರಿ ಅಂತ ಗುಬ್ಬಕ್ಕ ತೆಂಗಿನ ಚಿಪ್ಪಿನೊಳಗೆ ಮಲ್ಕೊಳತ್ತೆ. ಆಗ ಅದಕ್ಕೊಂದು ಕನಸು ಬೀಳುತ್ತೆ....

ತಾನೊಂದು ದೊಡ್ಡ ಅಂದ್ರೆ ದೊಡ್ಡ ರಟ್ಟಿನ ಡಬ್ಬ ತಂದಿಟ್ಕೊಳ್ಳೋದು, ಮಳೆ ಬಂದಾಗೆಲ್ಲಾ ಮನೆ ಬಿದ್ದೋಗಿ ಅಳ್ತಿರೋವ್ರಿಗೆಲ್ಲಾ ತಮ್ಮ ಮನೆಗೆ ಕರೆದುಕೊಂಡು ಬಂದು ಆ ಡಬ್ಬದಲ್ಲಿ ಸಣ್ಣ ಸಣ್ಣ ಬೆಡ್‌ರೂಂ ಮಾಡಿಕೊಡೋದು. ಅವರಿಗೆಲ್ಲ ತಾನು ದೊಡ್ಡ ಕುಕ್ಕರ್‌ನಲ್ಲಿ ಮಮ್ಮಮ್‌ ರೆಡಿ ಮಾಡ್ಕೊಡೋದು... ಸಣ್ಣ ಸಣ್ಣ ಪಾಪಚ್ಚಿಗಳಿಗೆ ದುದ್ದೂ ರೆಡಿ ಮಾಡಿ ಕೊಡೋದು ಹೀಗೆ....

ಹೂಂ... ಹೀಗೆನೇ ನಮ್ಮ ಮನೇಲಿ ರಾತ್ರಿಯಾದ್ರೆ ಸಾಕು... ಪುಟ್ಟಕ್ಕನನ್ನ ಇಂಥ ಕಥೆಗಳು ಆವರಿಸಿಕೊಳ್ಳೋಕೆ ಶುರು ಮಾಡಿವೆ. ಕಥೆ ನಿಲ್ಸಿದ್ರೆ ಅರೆಮಬ್ಬು ಬೆಳಕಿನಲ್ಲಿ ಕುಸುಕುಸು ಮಾಡಿ ಕಣ್ಣರಳಿಸೊ ಪುಟ್ಟಕ್ಕ, ಕಥೆ ಮುಂದುವರಿಸ್ತಿದ್ದಂತೆ ಇಷ್ಟಿಷ್ಟೇ ನಗ್ತಾ ನಗ್ತಾ ನಿದ್ದೆಗೆ ಇಳಿದು ಬಿಡ್ತಾಳೆ. ಇವಳ ಪಪ್ಪ ಕೂಡ ಆಗಾಗ ಕಣ್‌ಮುಚ್ಕೊಂಡೇ ನಗ್ತಾ ಇರ‍್ತಾನೆ :)