Thursday, February 11, 2016

ಮಗು ಮತ್ತು ಶಾಂತಿ


ಬಿಡಿಸಿನೋಡಿದೆ ಅದು ಕೆಂಬಣ್ಣ ಕಾಗದ
ಮಲಗಿದ್ದನಂವ ಮೊಣಕಾಲಿಗೆ ಮುಖವಿಟ್ಟು

ಮಿಸುಕಾಡನಂವ ಹಾಲು ಕೇಳನಂವ
ಚುಕ್ಕು ಬೇಡನಂವ ರಚ್ಚೆ ಹಿಡಿಯನಂವ
ಹೋಗಲಿ ಮುದ್ದೂ ಮಾಡನಂವ;
ಗೊತ್ತಿದ್ದೇ ಗಾಜಬಾಗಿಲೆಳೆದೆ
-ಗಾಜಹಲಗೆಯ ಮೇಲೆ ಮಲಗಿಸಿ

ಆ ಶಾಂತಮುಖಮುದ್ರೆಯೊಳಾವರಿಸಿದ
ನಗುಪದರ ಹಿಡಿದಿಡಬೇಕೆನ್ನುವಾಗೆಲ್ಲ
ಆ ಕೊಂಬು ಇಂಬಿನೊಳ ಪುಟಿದು
ಈ ಹೃಸ್ವ ದೀರ್ಘವಾಗುತ್ತಲೆ ಪ್ರಾಣ ಮಹಾಪ್ರಾಣದೊಳಗಡಗಿ ದೊಡ್ಡದೊಂದು ಸೊನ್ನೆಯುದ್ಭವಿಸಿಬಿಡುತ್ತದಲ್ಲ;
ತಲೆ ಕೈಯಾಡಿಸಿಕೊಂಡೆ ಸದ್ಯ ಮೊಳೆತಿರಲಿಲ್ಲ
-ಚಿವುಟಲು ಕೊಂಬು

ಏಣಿ ಎಷ್ಟಿರಲಿ ಕುಂಬಿ ಯಾವುದಿರಲಿ
ಮಾಡಿರಲಿ ಗೂಡಿರಲಿ ಕಾಡಿರಲಿ
ಯಾವುದಕ್ಕೂ ಮಧ್ಯ ಹಗ್ಗ ನೇತಾಡುತಲಿರಲಿ;
ಏರುವ ಗೆಲುವಿಗೆ ಸದಾ ಗೀಟಿನದೇ ಲೆಕ್ಕ

ಪಕ್ಕ ಕತ್ತರಿಸಿ ಸೊನ್ನೆ ಉರುಳಾಡಿಸಿ
ಪುಡಿಗಟ್ಟಿದ ಅದರೊಳಗೆ ಚುಕ್ಕೆಯೊಂದಾಗಿ
ಚಕ್ಕಳಬಕ್ಕಳ ಕೂತು ಸೋಲನ್ನೇ ಹೊದ್ದುಕೊಳ್ಳುವುದಿದೆಯಲ್ಲ ಅದಕ್ಕೆಂದೂ
ಗೀಟಿನ ಹಂಗಿಲ್ಲ ಗಿಲೀಟಿನ ಗೊಡವೆಯಿಲ್ಲ

ಭುಜವಲ್ಲಾಡಿಸಿ
ಅದು ಅದು ಬೇಕು, ಬೇಕು ಅದು;
ಕಿವಿಯೊಳಗೆ ಕೂಸನಾದ
ಚುಕ್ಕೆಹಂದರದಿಂದೆದ್ದು ಕಣ್ಣಿಗೆ ಕಣ್ಣಜೋಡಿಸಿ
ಬುದ್ಧ? ಎಂದೆ
ಎಳೆಮಡಿಲಿನೊಳಗೀಗ ಕಲ್ಲಕಣ್ಣ ಬಿಡಿಸುವಾಟ
ಬಾಲಭಾಷೆಯೊಳಗೆ ಮಿಂದೆದ್ದ ಬುದ್ಧನಾದ;
ಎದ್ದೇಲು ಬುಧಾ ಎದ್ದೇಲು

ಅರ್ಥವಾಯಿತಾ
ಗಾಜಮಂಟಪದೊಳಗೆ ನೀನ್ಯಾಕೆ ಎಂದು

-ಶ್ರೀದೇವಿ ಕಳಸದ

No comments: