Tuesday, February 23, 2016

ಸ್ಥಾವರವೆಂಬ ಗೋಡೆಗಂಟಿ

ಇದ್ದರೆ ಇರಲಿ ಅದೊಂದು ಮಧ್ಯಕ್ಕೆ
ದುಬುಟಿ ಒಣಗಿಸಲೊ ಲಂಗೋಟಿ ಸಿಕ್ಕಿಸಲೊ
ಕುಂಬಳ ಕುಡಿ ಚಾಚಲೊ ಕುಳ್ಳು ಅಂಟಿಸಲೊ
ಸಂಡಿಗೆ ತಟ್ಟೆಗೊ ಉಪ್ಪಿನಕಾಯಿ ಜಾಡಿಗೊ
ಬಿರಿದ ಮೊಲ್ಲೆ ಮಳ್ಳಮಳ್ಳನೆ ನಗಲೊ
-ಹುಸಿಮುನಿಸಿನಿಂದ ಅದ ಮುದುಡಲೊ
ನೋವ ದಾಟಿಸಿ ನೌಕೆ ಸಾಗಲೋ
ಸ್ಥಾವರದ ಸತ್ಯ ಹೊತ್ತು ನಿಂತ
ಆ ಗೋಡೆ ಇರಲಿ ಹಾಗೇ
ಕಣ್ತುಂಬಿಕೊಳ್ಳುತ್ತ ಮಲಗುತ್ತಿದ್ದೆ
ಇಂಥದೇ ಬೇಸಿಗೆಗೆ ಆ ಅಂಗಳದಲ್ಲಿ

ಅಂದೂ ಇಂಥದೇ ನಡುಗತ್ತಲು ಮತ್ತು ಪೌರ್ಣಿಮೆಯ ನೊರೆಹಾಲು
ಕಾಲಬುಡದ ಬೆಕ್ಕಿಗೋ ತೋಳಕಾವಿನ ಬಯಕೆ
ಬೆರಳು ಮೀಸೆ ನೇವರಿಸಿದರೆ ಕಣ್ಣು ಕುಂಬಿಯತ್ತ
ಗೋಡೆಸಾಲಿನ ತುಂಬ ಪುಟ್ಟ ಚಂದಿರರು!
-ಕನಸೂ ಅಲ್ಲ ಖರೆಯೂ
ಕಾಯ್ದೆ
ಕತ್ತಲು ಸರಿಯಿತು
ಗೋಡೆನೆತ್ತಿಗುಂಟ ಎದೆಸೀಳಿ
ಮುಖಹುಗಿದ ಗಾಜಬಾಟಲಸಾಲು!

ಗೋಡೆಗೆ ಕಿವಿಯಾನಿಸಿ ನಿಂತೆ
ಓಣಿಯೇ ಆಕಾಶವಾಣಿ;
ಕುಂಬಳ ಮಿಡಿ ಕಚ್ಚಿದ ಮಂಗಗಳು
ಮಾಯವಾದ ಒಡಕು ಬಿಂದಿಗೆ-ಹೊರಸಿನ ಹಗ್ಗ
ಕೆರೆಯಂಗಳದಿ ಸಿಕ್ಕ ಕೀಲುಬಂಡೆ
ಗುಡ್ಡದ ಹಾದಿಯಲ್ಲಿ ಉದುರಿದ ಗೆಜ್ಜೆ
ಸಾಕಿಷ್ಟೇ ಮುಖ್ಯಾಂಶ ಹಿಂದಿಟ್ಟೆ ಹೆಜ್ಜೆ

ಅದ್ಯಾರ ಎಡವಿಗೆ ಇದ್ಯಾವ ತಡೆ?
ದಂಗಾಗುವಂತಿಲ್ಲ, ಸ್ವೀಕರಿಸು ಮರುಳೆ
ಗೋಡೆಯ ಇನ್ನೊಂದು ಬದಿ ನಿನ್ನದಲ್ಲ

- ಶ್ರೀದೇವಿ ಕಳಸದ

2 comments:

sunaath said...

ಸ್ವಾರಸ್ಯಮಯ, ಮನವಂ ಪೊಗುವ ಕವನ, ಶ್ರೀದೇವಿ!

ಆಲಾಪಿನಿ said...

Thank u uncle :)