Saturday, March 26, 2016

ತೀವ್ರ ಮಧ್ಯಮ


ಬಟ್ಟೆಯಿಂದ ಮೈಯೊರೆಸುವುದೇನು
ಚಿತ್ತಾರವರಳಿಸಿ ಸೆಳೆಯುವುದೇನು
ನೊಣ ಹಾರಿಸುವುದೇನು
ಬಣ್ಣದ ಹಾಳೆ ಅಂಟಿಸಿಡುವುದೇನು
ಆಹಾ... ಮೈದುಂಬಿ ಮಿರುಗುವ ಇವರೆಲ್ಲ
-ಮುಂದಿನ ಸಾಲಿನ ನಾಯಕರು

ನನಗೆ ನಿನಗೆ ನಿನಗೆ ನನಗೆ
ಕಾಲು ಅರ್ಧ ಒಂದು ಹೋಳು ರುಚಿಗೆ
ಎರಡು ಮೂರು ಕೇಜಿಗೆ
ಮೇಲೊಬ್ಬರ ಮೇಲೆ ಬಿದ್ದೂಬೀಳದೆ
ಹಸಿಬಿಸಿನೋಟುಗಳ ಕೈಯೂಬಿಡದೆ
ಗುಣಗಾನಿಸುತ್ತಲೇ ಅವರೆಲ್ಲ ನುಗ್ಗುವುದಿದೆಯಲ್ಲ
-ಇದೆಲ್ಲವೂ ಹಣ್ಣುಕೊಳ್ಳುವತನಕವಷ್ಟೆ

ಗಿಣಿಕಚ್ಚಿದ ಮುಕ್ಕಾದ ಮಣ್ಣಾದ
ಪುಟಿದು ಪುಳುಪುಳಿಸಿ ಮೆದುವಾದ
ಕಳಿತು ಕೆಳಬಿದ್ದು ಕಾಲುಮುರಿದುಕೊಂಡವರೇ
ಕೊಳ್ಳುಗರ ಮೂಗರಳಿಸಿ ಕಾಲಸೆಳೆದವರೇ
ಅಸಲಿನ ರುಚಿಸಾರಿಗರು ಅವರೇ
ಹಿಂದಿನ ಸಾಲಿನವರು

ಜಾತ್ರೆ ಇರುವ ತನಕ ಜನ, ಜನರಿರುವ ತನಕ ಜಾತ್ರೆ
ಜಂಗುಳಿಯ ತೊರೆದು ತೋಟ ಕಾಯಲು ಹೋದ
-ದೇವರು ಮಧ್ಯದಾರಿಯೊಳಗೆ ಸಾಗಿ
ಮರದಡಿ ನಿದ್ದೆ ಹೋಗಿದ್ದಾನೆ
ಎಬ್ಬಿಸದಿರಿ ನೈವೇದ್ಯದ ನೆಪದಲ್ಲಿ

- ಶ್ರೀದೇವಿ ಕಳಸದ

2 comments:

sunaath said...

ಇದು ಅಸಲೀ ಮಾವಿನ ಕವನ!

ಆಲಾಪಿನಿ said...

Hmmmm uncle