Thursday, March 3, 2016

ಬಂಗಾಳಿ ಬಾಬುವಿನ ಆಕಾಶಕೋಲು



'ಇದರ್ ದೇಖೋಜಿ ಮ್ಯಾಡಮ್' ಎಂದು ಅವ ಆಕಾಶ ನೋಡುತ್ತ ದೂಳುಕೋಲು ಮೇಲೇರಿಸಿದ. ಔರ್ ಏ ದೇಖೊ ಸ್ಟಿಫ್ವಾಲಾ ಎಂದು ನೆಲಕ್ಕೆ ಕುಕ್ಕಿದ. ಬೇಗ ಮುರಿಯುತ್ತೆ ಎಂದು ಗೊತ್ತಿದ್ದರೂ ಆಕಾಶಕ್ಕೇರಿದ ದೂಳುಕೋಲನ್ನೇ ಆಯ್ಕೆ ಮಾಡಿಕೊಂಡೆ. ಮುನ್ನೂರೈವತ್ತು ಅಂದ. ಚೌಕಾಶಿ ಬೇಡ, ನೀವೇ ಒಂದು ರೇಟ್ ಹೇಳಿ ಎಂದೆ.  ಇನ್ನೂರು ಎಂದ, ಕೊಟ್ಟೆ. ನೀವು ಹಿಂದೀ ಚೆನ್ನಾಗಿ ಮಾತನಾಡುತ್ತೀರಿ ಬಹಳ ಖುಷಿಯಾಯ್ತು ನೀವು ನಮ್ಮ ಊರು ಕಡೆಯವರಾ ಎಂದು ಕಣ್ಣರಳಿಸಿದ.  ಇಲ್ಲ ನಾ ಇಲ್ಲಿಯವಳೇ ಅಂದೆ. ಏಳನೇ ಕ್ಲಾಸಿಗೇ ಹಿಂದೀಯನ್ನು ಇಳಿಸಿ ಸಂಸ್ಕ್ೃತ ಎತ್ತಿಕೊಂಡಿದ್ದೆನಾದ್ದರಿಂದ, ಹಿಂದೀ ಈಗಲೂ ನನ್ನ ಮೇಲೆ ಮುನಿಸಿಕೊಂಡೇ ಇದೆ ಎಂದುಕೊಂಡಿದ್ದೆ. ಆದರೆ ಆಡ್ತಾ ಆಡ್ತಾ ಸರಾಗವಾಗಿ ಕೈಕಿರುಬೆರಳು ಹಿಡಿದು ನಡೆಯತೊಡಗಿತು.

'ಹಣ ಇದ್ದರೆ ಎಲ್ಲಾ ನೋಡಿ. ಅದಿರದಿದ್ದರೆ, ಕಟ್ಟಿಕೊಂಡ ಹೆಂಡತಿಯೂ ದೂರ ಸರಿಯುತ್ತಾಳೆ ' ಆಜಾ ಬೇಟಾ ಎಂದು ಮಗಳನ್ನು ನೋಡಿ, ಎತ್ತಿಕೊಳ್ಳಬಹುದಾ ಎಂದು ಕೇಳಿದ. ಮಾತನಾಡುತ್ತಾ, ಕೇರಳದ ಮಂದಿಯೂ ಬಹಳ ಒಳ್ಳೆಯವರು, ಹಿಂದೊಮ್ಮೆ ಇಷ್ಟೇ ಚಿಕ್ಕ ಮಗುವೊಂದನ್ನು ಹೀಗೆಯೇ ಎತ್ತಿಕೊಂಡಿದ್ದೆ. ಅರ್ಧ ಗಂಟೆಯ ನಂತರ ಒತ್ತಾಯದಿಂದ ಮಗುವನ್ನು ಕರೆದುಕೊಂಡು ಹೋದರು. ನನ್ನ ಮಗನೂ ಈಗ ಹತ್ತನೇ ಕ್ಲಾಸಿನಲ್ಲಿದ್ದಾನೆ. ಕೊಲ್ಕತ್ತದಲ್ಲೇ ತನ್ನ ತಾಯಿಯೊಂದಿಗೆ' ಎಂದು ನನ್ನ ಮಗಳನ್ನು ಕೆಳಗಿಳಿಸಿದ.

ಪುಟ್ಟ ದೂಳುಕೋಲಿಗಾಗಿ ಮಗಳು ರಂಪ ಹಿಡಿದಾಗ ಕೊಟ್ಟು ಸಮಾಧಾನಿಸಿದ. ಹೀಗೇ ನೋಡಿ ಎಲ್ಲರೂ, ಬೇಕು ಅಂದ್ರೆ ಬೇಕು. ಈಗ ಮಗು ಹೇಳುತ್ತಿರುವುದೂ ಅದೇ, ಬೇಕು ಬೇಕು ಬೇಕು. ಈ ಶಬ್ದದ ವಿನಾ ಅದು ಬೇರೇನೂ ಮಾತನಾಡುತ್ತಿಲ್ಲವಲ್ಲ? ಎಂದು ತಾತ್ವಿಕವಾಗಿ ಹೇಳಿದ. ನೀವು ಶಾಲೆಗೆ ಹೋಗಿದ್ದೀರೋ ಎಂದಿದ್ದಕ್ಕೆ, 'ಬಿಕಾಂ ಅರ್ಧಕ್ಕೆ ನಿಲ್ಲಿಸಬೇಕಾಯಿತು ಅಮ್ಮ ತೀರಿಹೋದದ್ದರಿಂದ. ನಾ ಒಬ್ಬನೇ ಮಗ. ಐದು ವರ್ಷದವನಿದ್ದಾಗಲೇ ಅಪ್ಪನನ್ನು ಕಳೆದುಕೊಂಡೆ. ಸಂಬಂಧಿಕರೂ ಚದುರಿದರು. ಈಗ ನಾನಿಲ್ಲಿ ಹನ್ನೊಂದು ವರ್ಷದಿಂದ' ಎಂದ.

ಎಲ್ಲಿದ್ದೀರಿ ಎಂದಿದ್ದಕ್ಕೆ ಮೆಜೆಸ್ಟಿಕ್ ನ ಲಾಡ್ಜ್ ಒಂದರಲ್ಲಿ ನಾಲ್ಕೈದು ಜನ ರೂಮು ಮಾಡಿಕೊಂಡಿದ್ದೇವೆ. ಕೊಲ್ಕತ್ತೆಯಿಂದ ಸೀರೆ ತರಿಸಿಯೂ ಮಾರುತ್ತೇವೆ. ವರ್ಷಕ್ಕೆ ಮೂರು ಸಲ ಊರಿಗೆ ಹೋಗುತ್ತೇವೆ. ಎಷ್ಟೋ ಸಲ ಖಾಲೀ ಕೈಯಲ್ಲಿ ರೂಮಿಗೆ ಹೋಗಿದ್ದೂ ಇದೆ. ಆದರೆ ಊರಿಗೆ ಹೊರಡುವ ವೇಳೆ ಹೇಗೋ ಸ್ವಲ್ಪ ಹಣ ಜೇಬಲ್ಲಿರುತ್ತದೆ ಎಂದ.

ದಾರಿಹೋಕ ಹೆಣ್ಣುಮಗಳೊಬ್ಬಳು ನೂರು ರೂಪಾಯಿಗೆ ಕೊಡುತ್ತೀರಾ ಎಂದು ಆಕಾಶಕ್ಕೇರುವ ದೂಳುಕೋಲು ಕೇಳಿದಳು. ಅವ ಇಲ್ಲ ಎಂದ, ಅವಳು ತಿರುಗಿ ನೋಡದೆ ಹೋದಳು. 'ಈಗ ಯಾರಿಗೂ ಸಮಯವಿಲ್ಲ, ಕೇಳಿದ ರೇಟಿಗೆ ಕೊಡದಿದ್ದರೆ ಹೊರಟುಬಿಡುತ್ತಾರೆ. ಜನರ ನಡುವೆ ಈಗ ಮಾತೂ ಅಪರೂಪವಾಗಿದೆಯಲ್ಲ?' ಎಂದನಂವ. ನನ್ನ ಕಣ್ಣು ಪ್ಲಾಸ್ಟಿಕ್ ಎಳೆಗಳನ್ನು  ಸಿಕ್ಕಿಸಿಕೊಂಡ ಒಂಟಿಗಳದ ಮೇಲೆ ಹೊರಳಿತ್ತು.

6 comments:

sunaath said...

ನಮ್ಮನ್ನೂ ಆಕಾಶಕ್ಕೇರಿಸುತ್ತಿದೆ ಈ ಧೂಳಿಕೋಲು!

ಆಲಾಪಿನಿ said...

ಅಲ್ವಾ ಅಂಕಲ್

ನರೇಂದ್ರ ಪೈ said...

ತುಂಬ ಇಷ್ಟವಾದ ನಿರೂಪಣೆ. ಮತ್ತಷ್ಟು ವಿವರ ಬೇಕು ಬೇಕು ಅನಿಸುವಾಗಲೇ ಮುಗಿದು ಹೋಯ್ತು. ಮನಸ್ಸಿನ ತುಂಬ ಟಾಗೋರ ಕಾಬೂಲಿವಾಲನ ಸಂವೇದನೆಯನ್ನು ಉದ್ದೀಪಿಸುವ ಬರಹ ಇದು.

ನರೇಂದ್ರ ಪೈ said...

ತುಂಬ ಇಷ್ಟವಾದ ನಿರೂಪಣೆ. ಮತ್ತಷ್ಟು ವಿವರ ಬೇಕು ಬೇಕು ಅನಿಸುವಾಗಲೇ ಮುಗಿದು ಹೋಯ್ತು. ಮನಸ್ಸಿನ ತುಂಬ ಟಾಗೋರ ಕಾಬೂಲಿವಾಲನ ಸಂವೇದನೆಯನ್ನು ಉದ್ದೀಪಿಸುವ ಬರಹ ಇದು.

ಆಲಾಪಿನಿ said...

Hmmmm. Thank u sir

ಆಲಾಪಿನಿ said...
This comment has been removed by the author.